Baliabideak koordinatzeko sare-lana; udal-eraikinak gune komunitario gisa berreskuratzea eta etxez etxeko arreta-zerbitzua hobetzea, EH Bilduren ekimenak

“Pertsona ekintza politikoaren erdigunean jartzeaz eta bere beharrak kontuan hartzeaz ari garenean, pertsonak zaintzeaz ari gara, pertsona guztiak zaintzeaz”. Joseba Asironek, EH Bilduren Iruñeko alkategaiak, gai horri buruzko proposamenen testuingurua zehazten zuen. Zainketa-eredu berri bat, sareko eta komunitateko lanean oinarritua; gizarte-sarea ahalduntzea, udal-eraikinak komunitate-gune gisa eskainiz, edo San Juan-Donibaneko Pertsona Nagusiaren Ituna auzo guztietara hedatzea, horietariko hiru dira.

“Zaintzak ezin dira banakako kontua izan, modu kolektiboan erantzun behar zaio gaiari, eta, horretarako, ezinbestekoa da instituzioetatik pertsonen beharrei erantzungo dieten proiektuak eta zerbitzuak abian jartzea, merkatu pribatuaren interesen aurrean irtenbide publikoekin», laburbildu zuen Asironek. EH Bilduk Ekintza Komunitarioaren eta Zaintza Sarearen eredu berri bat proposatu du, auzo guztietan auzoko unitateak, prebentzio-taldeak, haur eta gazteentzako erakundeak, Polizia Komunitarioa, osasun-kontseiluak, hezkuntza-komunitatea eta zentro komunitarioak barne hartu eta koordinatzeko. Era berean, uste du “funtsezkoa dela ahalduntze soziala eta gizarte-ehun aktiboa sustatzea, auzoetan komunitate-espazioak sortuz eta erabiltzen ez diren eraikin eta lokalen lagapena bultzatuz, askotariko proiektu autogestionatuak garatzeko”.

Panel sozial bat sortuko da Herritarren Behatokian, hiriaren egoera soziala ezagutzeko eta haren jarraipena egiteko oinarrizko datuak jasoz (bazterketa, pobrezia, etxebizitza eskuratzea, eskolatzea, baliabide publikoak eta pribatuak, etab.). “Helburua arazo horiei behar bezala erantzutea da”, zioen Asironek.

65 urtetik gorako pertsonei dagokienez, biztanleriaren % 22 ingurukoa, helburua da “bizi-kalitatea hobetzea, autonomia pertsonala sustatzea, mendekotasuna saihestea eta zaintzen dutenen atseden familiarra erraztea”. Tresna izango da Donibaneko Adineko Pertsonaren Ituna auzo guztietara zabaltzea. Etxez etxeko arreta-zerbitzua hobetzea eta alojamendu-kolaboratiborako proiektuak bultzatzea (cohousing senior) dira esparru horretako beste ekimen batzuk.