Alderdiak ekitaldi batera deitu ditu bere jarraitzaileak larunbatean, hilak 17, 12: 00etatik aurrera San Frantzisko Plazan

Iruñeko EH Bilduko militantziak aho batez babestu zuen Joseba Asironek Iruñeko Udala osatzeko Osoko Bilkuran (12: 00etan) alkatetzarako hautagaitza aurkeztea. Descalzoseko aretoan egindako batzar batean, hauteskundeetako emaitzek EH Bilduri gobernu aurrerakoi eta ezkertiar baten buru izateko eman zioten “zilegitasuna” defendatu zuten, baita legegintzaldi honetako ezberdinen arteko elkar ulertzea alkatetzara eramateko koherentziaren aldarrikapena ere. Horrela ba, bertaratutakoek EH Bilduk betorik eta bazterketarik ez onartzea eskatu zuten, ezta horietaz oinarritzen edo baliatzen diren hirugarren bideak ere”.

Batzarrean izan ziren Joseba Asiron hautagaia, Miren Zabaleta EH Bilduren Nafarroako koordinatzaile nagusia eta Endika Alonso Iruñeko koordinatzailea. Bertan, hauteskundeetako emaitzen irakurketa eta hartu beharreko erabakien azterketa partekatu ziren. Azterketa hau hiru ideia nagusietan laburbiltzen da: “Iruñeko alderdiak lortutako emaitza historikoak izan direla, lehen aldiz eskuinari begietara begiratzen diogula eta EH Bilduk hiriburuan izan duen hazkundea ez dela gauza puntuala, egiturazkoa baizik”. “Zinegotzigo kopurua berdintzeko 770 botora geratu gara, eta 2.900 botora UPNri irabazteko, eta ziur 2027an lortuko dugula”, aldarrikatzen zuen hautagai soberanistak.

Asironek larunbatean alkatetzarako hautagai izateko erabakiari dagokionez, EH Bilduren oinarriek pitzadurarik gabe babestu zituzten zuzendaritzaren argudioak: M28an erakutsi dute herritarrek EH Bilduk zuzendutako gobernu aurrerakoia nahi dutela (16 zinegotzi aurrerakoitik 8); lau urte hauetan egindako lanak erakusten du ezberdinen arteko ulermena posible dela, eta EH Bilduk beti defendatuko du oinarrizko printzipio demokratikoa, hots, bozkatuena izango den indar aurrerakoiak erakunde bakoitzaren buru izan behar duela. Argudio horietan oinarrituta, printzipio hori errespetatzen ez duten, biztanleriaren % 27,4ren bazterketan oinarritzen diren edo horretaz baliatzen diren hirugarren bideak ere baztertzen dira.

Batzar horretan bertan jakinarazi zutenez, EH Bilduk bere militante eta jarraitzaileei dei egingo die larunbatean, eguerdiko 12etatik aurrera, San Frantzisko plazan egingo den ekitaldian parte hartzeko. Asironek berak parte hartuko du Osoko Bilkura amaitutakoan.