Albisteak

2025-04-03

Gobernuak Osasunbidea enpresa-erakunde publiko bihurtzea baztertu izana ospatu du EH Bilduk

Gobernuak Osasunbidea enpresa-erakunde publiko bihurtzea baztertu izana ospatu du EH Bilduk NAFARROA

EH Bildu Nafarroa pozik agertu da Osasun Departamentuak gaur iragarri duelako Osasunbidea-Nafarroako Osasun Zerbitzua erakunde autonomo izatetik enpresa erakunde publiko izatera pasatzeko asmoa baztertu duela. Era berean, nabarmendu du alderdiaren aldarrikapen nagusietako bat zela eta, beraz, poztu egiten direla “Gobernuak horrekin aurrera egingo ez duelako”.

Hasiera-hasieratik defendatu dugun bezala, ez gatoz bat neurri horrekin; izan ere, lehenik eta behin, Nafarroak eskumen historiko eta esklusiboa galtzea ekarriko luke, lan-kontratuko langileak Estatuko lan-legeriaren mende egongo bailirateke”. Halaber, “kontrol eta gardentasun galera ere ekarriko luke, eta hori funtsezkoa da ustezko ustelkeria kasuak saihesteko”. Gainera, alderdi subiranistak berriro nabarmendu du “ez lukeela abantaila kualitatiborik ekarriko, egungo arazoak ez dituelako konpontzen eta pribatizazioa areagotzea ekarriko lukeelako”. “EH Bildun Osasunbidearen kudeaketa zuzenaren alde egiten dugu, osasun arretaren kalitatearen zein langileen lan baldintzen berme gisa”, defendatu dute.

Horren harira, EH Bilduk balioan jarri du urte amaieran osasun-lege berriaren zirriborroari buruz zer iritzi duten jakiteko osasun-arloko eragileekin egin zuen bilera-sorta. Horren ostean, EH Bilduk Osasunbidea eraldatzeko bere ildo nagusiak aurkeztu zituen, eta foru Gobernuarekin ere partekatu zituen.

Hala, osasun sistema publiko unibertsala bermatzeko beharra azpimarratu du alderdiak, “ongizate estatuaren eta gure bizi kalitatearen funtsezko zutabea baita”. Modu berean, konpromisoa eta asmoa agertu du “ildo horretan eta gobernuarekin lankidetzan lan egiten jarraitzeko, Nafarroak sistema publikoa blindatuko duen Osasun Foru Lege eraginkor berri bat izan dezan”.

Hartu hitza!
Zure ideiak entzun nahi ditugu
Batu!
Aktibisten sarera gehitu zaitez
Saretu!
Sare sozialetan aktibismoa
Deskargatu!
Material eta bitartekoen kit-a