EH Bildu Nafarroa talde parlamentarioak kritikatu du Hezkuntza Departamentuak “oraindik ez duela ebatzi sexuagatik bereizten duten ikastetxeek sinatutako Batxilergoko itunetan indarrean dagoen legeria ez betetzeagatik irekitako administrazio-prozedura”.

Alderdi politikoak ohar batean azaldu duenez, “ikasturtearen hasieran, 2022ko irailean, Hezkuntzako Ikuskaritzak ziurtatu zuen ikastetxe batzuek ez zutela legeria betetzen, eta kontseilariak jakinarazi zuen horrek Batxilergoko itunak iraungi zitzakeela”. Zehazki, irailaren 12an, Hezkuntzako kontseilariak berak jakinarazi zuenez, “laster bidaliko ziren ikastetxeetara ikuskapen-aktak, alegazioak egin ahal izateko; eta administrazio-prozedura bat jarriko da abian, segurtasun juridiko osoz, eta horrek itunak iraungitzea ekar lezake”.

Era berean, joan den urriaren 6an, Nafarroako Parlamentuak mozio bat onartu zuen, Hezkuntza Departamentua premiatuz “araudia ez betetzeari buruzko administrazio-prozedura ahalik eta lasterren bukatzera, hezkidetza edo, hala badagokio, ikasturte honetan bertan finantzaketa publikoa galtzeko beharrezko neurriak hartuz, kontuan izanik itun horiek ezin direla inola ere luzatu 17/2012 Foru Legean oinarrituta, aukera hori derrigorrezko etapetan soilik dagoelarik”.

Ildo horretan, EH Bilduk agerian utzi duenez, “2023rako hilabete gutxi falta dira ikasturtea amaitzeko, eta oraindik ez dugu administrazio-prozeduraren ebazpenari buruzko berririk”.

Hori dela eta, Departamentuari galdegin dio “zein egoeratan dagoen administrazio-prozedura, zeinaren ebazpenak itunak amaitzea ekar lezakeen, Hezkuntza kontseilariak iragarri zuen bezala”, eta eskatu du “ikasleak sexuaren arabera banatzen jarraitzen duten eta, beraz, legea urratzen jarraitzen duten ikastetxeei kontzertu ekonomikoak kentzea”.