EH Bilduk Nafarroako Parlamentuan mozio bat aurkeztu du Nafarroako Foru Erkidego osoa Etxeko Merkatuko Zonalde Tentsionatu izendatzeko prozedura legalari hasiera emateko. Horrela adierazi du Laura Aznalek, formazioaren bozeramaileak nafar Gobernuko lehendakariari osoko bilkuran egindako galdera batean. Etxebizitzaren merkatuaren porrotaren aurrean anbizio handiko neurri politiko eta publikoak erebakitzeko beharra ere defendatzen du testuak, eta horretarako prozesu hori aurrera eramateko azterketa eta analisi guztiak egitea eskatzen du ere.

Mozio honen bidez, Gobernuari eskatzen zaio ere Nafarroak etxebizitzaren arloan dituen berezko eskumenen barruan, Nafarroako errealitate sozial, ekonomikora eta lurraldera egokitutako alokairuaren prezioen informazio eta erreferentzia-indize sistema propio bat garatzea, eta foru-eskumenen eremuaren barruan izan ditzakeen aplikazio guztiak aztertu eta garatzea.

Bizileku-larrialdia arazo orokortua da, eta leku guztietan modu berean eta intentsitate berarekin agertzen ez bada ere, etxebizitza eskuratzeko zailtasunek lurralde osoari eragiten diote dagoeneko, eta aspaldi ez dira fenomeno isolatuak.

Arazo orokortuen aurrean, irtenbide integralak behar dira, eta, hala ere, Nafarroako Foru Erkidegoko eta Euskal Autonomia Erkidegoko gobernuek, orain arte, Etxeko Merkatu Tentsionatuko Eremuen aplikazio mugatuaren alde egin dute, beren lurraldeetako zati handi bat kanpoan utzita. Uko egin diote, beraz, tresna horren potentzial guztia erabiltzeari, orokortua dela dakiten arazo baten aurrean.

Esperientziak erakusten du, gainera, esku-hartze publikoak lagundu egiten duela merkatuko prezioei eusten. Hego Euskal Herrian, zonalde tentsionatuetan eskuragarri dauden lehen datuen arabera, alokairuaren prezioak moderatu egin dira, eta are jaitsi ere, hainbat udalerritan. Europako hainbat tokitan bildutako esperientziak ere erakusten du erregulazioak, beste etxebizitza-politika publiko batzuekin batera, prezioei eusten laguntzen duela eta etxebizitza eskuratzeko kota handiagoak bermatzen dituela.

Beste urrats bat eman behar dela uste dugu, eta beste neurri batzuekin batera, Etxeko Merkatu Tentsionatuko Eremuen deklarazioa da gaur egun hori egiteko eta herritarrek etxebizitza bat eskuratzeko duten eskubidea bermatzeko tresna nagusietako bat.

Autogobernua herritarren beharren zerbitzura jarri behar da. Horregatik, Hego Euskal Herri osoan norabide berean aurrera egitea planteatzen dugu, lurralde bakoitzeko errealitate eta eskumen propioetatik abiatuta, baina dugun autogobernua ahalik eta anbizio handienarekin erabiltzeko helburu partekatuarekin, interes espekulatiboen gainetik, etxebizitza duin eta eskuragarrirako sarbidea bermatzeko.