Labairuk, Herritarren Segurtasunerako zinegotziak, Toki Administrazioaren Legea, Hondakinei buruzkoa eta Higieneari buruzko Ordenantza urratzen dituen espedientea sinatu zuen

"Nahiz eta behin eta berriz ohartarazi genien espedientea legez kanpokoa zela, Higiene-Ordenantza bezalako oinarrizko araudiak betetzen ez zituelako, UPNk aurrera jarraitu zuen eta orain arrazoia genuela frogatu da. Horregatik, orain Gaztelu Plazan barra horiek indarrez jarri zituztenek erantzukizunak hartu behar dituzte legez kanpoko ekintza horren aurrean". Horrela baloratu du EH Bilduk TANen ebazpena. Ebazpen honen arabera, Maya (UPN) buru zuen gobernu taldeak 2022ko Sanferminetan barra horien lizentziak ematerakoan hiru araudi ezberdin urratu zituela dio. "Ez dugu beste alde batera begiratuko; justifikaziorik gabeko eta legez kanpoko mesede-tratua eman zitzaien establezimendu jakin batzuei, beste batzuen kaltetan, eta ezagutza osoarekin egin zen gainera" dio talde subiranistak.

EH Bilduk gogorarazi duenez, "Osoko Bilkuren Aretoan esertzen da oraindik baldintza-agiri hura sinatu zuen zinegotzia, Labairu jauna”. “Gure ustez, bere erantzukizun politikoak utzi beharko lituzke; izan ere, berriz diogu, legez kanpoko agiri bat ezarri zuen eta lizentzia irregularrak eman zituen, ohartarazpenei muzin eginez eta, beraz, egiten ari zena legez kanpo zegoela jakinda", argudiatu du EH Bilduk.

Espediente hark, lehenik eta behin, Nafarroako Toki Administrazioari buruzko Foru Legea urratu zuela ziurtatzen du TANek, lizentziak emateko prozedura publiko batek "publizitate eta lehia arauak" errespetatu behar dituenari dagokionez. "Aldi baterako jarduera da, eta, hasiera batean, tokiko edozein ostalaritza-establezimendu onartu beharko litzateke (...) ez bakarrik kale edo plaza jakin batzuetan daudenak".

Horretaz gain, pleguak eta prozedurak ez zuen bete Hondakinei buruzko Foru Legea eta honen fiskalitatea bi zentzutan: lehenik eta behin, erabilera bakarreko ontziei dagokienez ("ontziak berrerabilgarriak izan behar ziren") eta, bigarrenik, edateko urik ez egoteari dagokionez. Horri dagokionez, TANek gogorarazi du legeak honako hau ezartzen duela: "baimenaren baldintzek bermatu egin behar dute eskatzen duten bezeroei edateko ura eskaini behar izatea, eta horretarako, gutxienez edukiera nahikoa duten depositu eramangarriak behar direla". Hala ere, ez zen halakorik gertatu.

Azkenik, prozedura horrek Elikagaien Higieneari buruzko Udal Ordenantza ere urratu zuen. Horren arabera, "sareetarako konexioaren ordez hondakin-uren biltegiratze eta deuseztatze higienikorako deposituak soilik erabil daitezke, udalaren aldez aurreko baimenarekin". Horri dagokionez, TAN oso irmoa da: baimen hori emateko, "udal langileen analisi tekniko espezifikoa (...) behar zen, baina ez dago jasota eta ez da alegatzen udalak horrelakorik egin zuenik".