Nafarroako Gobernuko presidentegaiak, Laura Aznalek, balioan jarri du EH Bildu dela “Nafarroako lehen indar munizipalista, hautagaitza gehien aurkeztu dituena lurraldearen luzera eta zabaleran”, eta nabarmendu du “ez dela kasualitate bat, baizik eta azken urteetan auzoetan eta herrietan egindako lanaren emaitza”.

Honako adierazpenak egin ditu Aznalek EH Bilduk, larunbat goizean, Iruñeko Udal plazan burutu duen ekitaldian. Bertan, EH Bilduk Nafarroa osoko herrietako 50 alkategai inguru bildu ditu eta Aznalek berak bai eta Iruñeko Udaleko zerrendaburuak ere, Joseba Asironek, hartu dute hitza.

Aznalek gogorarazi duenez, “neurri asko sustatu ditugu eremu munizipalistan, hala nola tokiko finantziazio-sistema, toki-erakunde guztietan salbuespenik gabe pentsatuz”. “Krisi energetikoaren ondorioz Nafarroako toki entitateei laguntza ekonomikoa emateko ere lan egin dugu, aparteko bi funts abian jarriz”, defendatu du.

Ildo horretatik, presidentegaiak esan du “erronka asko ditugula aurrean tokiko administrazioan eta lurralde-kohesioan aurrera egiteko”. Hala, “lehenik eta behin, iritsi da tokiko mapa garatzeko garaia, eta hori izango da gure apustu nagusia, gure ondarea defendatzearekin edo despopulazioari aurre egiteko egitura-neurriekin batera”, adierazi du. “Horretarako, ezinbestekoa da EH Bildu indartsu egotea udaletan, lehen indar munizipalista izaten jarraitzea eta Nafarroako Parlamentuan ere erabakigarriagoak izatea”, aldarrikatu du Aznalek.

Bere aldetik, Iruñeko Alkatetzarako hautagaiak, Joseba Asironek, aldeztu du “anbizio handiko izateko eta herritarren bizitza hobetzeko udalak duen indarra balioesteko garaia” dela. “Udalak osatzeko erabakietan, jendeak irabazi behar du, eta guk proiektu bat eskaintzen dugu Nafarroarentzat, eta herriz herri, uste dugu hori dela garrantzitsuena EH Bildurentzat: gure herriak eta hiriak hobetzea. Gure bizilagunen bizitza hobetzea. Eta, gainera, auzolanean jendearen eskutik egitea”, amaitu du Asironek.