Joseba Asironek EH Bilduk datozen urteetarako defendatzen dituen hiri eredua eta proiektuak bultzatzeko lan ildoak azalduko ditu

EH Bildu Iruñeak lan jardunaldi irekia egingo du datorren larunbatean, maiatzaren 28an Nafarroako hiriburuan egingo den hitzorduari begira hauteskunde programa partekatu eta amaitzeko. Jardunaldia zortzi lan-mahairen inguruan egituratuko da, eta Pamplona Catedral hoteleko Capilla aretoan izango da, 10: 00etatik 13: 00etara. Joseba Asiron Iruñeko alkategaiak emango dio hasiera jardunaldiari, eta EH Bilduk datozen urteetarako bultzatzen dituen proposamenak, proiektuak eta hiri eredua egituratzeko ildo nagusiak azalduko ditu.

Ekintza komunitarioa eta parte-hartzea; Adinekoak; Etxebizitza; Trantsizio energetikoa eta mugikortasun jasangarria; Euskara eta kultura auzoetan; Pobrezia eta bazterketa soziala; Merkataritza, ekoizpena eta tokiko ekonomia eta Segurtasuna eta askatasun demokratikoak izango dira lanaldia antolatuko duten zortzi mahai tematikoak. Bertaratuek parte hartzeko mahaia aukeratu ahal izango dute. Mahai guztiek eztabaida dinamizatua izango dute, eta, horien garapenean, bertaratuek aurkez ditzaketen proposamenak jaso eta baloratuko dira. “Alkatetza lortzeko bidea argi eta garbi dago, eta jardunaldi honekin gurekin egon nahi duten herritarren ordezkariekin kontrastatu eta osatu nahi dugu, hobetzen lagun diezaguten”, EH Bilduren Iruñeko Mahaitik azaldu dutenez.

Larunbat honetan amaituko dira EH Bilduk Indara aretoan egin zituen lehenengo jardunaldi irekietan ekainaren 11n hasitako hauteskunde-programaren diseinu-lanak. Diagnostikoa egin eta programaren ildo nagusiak zehazten lagundu zuen hitzordu haren ondoren, alderdi abertzaleak bilera sektorialak egin ditu hiriko 150 bat kolektiborekin, eta lan-saio espezifikoak egin ditu auzo bakoitzeko elkarte-sarearekin. Emaitza lehen dokumentu bat da, orain eztabaidatuko diren bostehun bat proposamen biltzen dituena.

Jardunaldi honetarako ateak 9: 45ean irekiko dira. 10: 00etan hasiko dira, Joseba Asironen hitzaldiarekin, eta 13: 00etan amaituko dira.